Nib ye………… Ntuj nas me hmoob txiv leej tub, thaum ua nkauj ua nraug nyob kuv yog me nyuam ntxhais koj yog leej niam leej txiv tus me nyuam TUB es wb nim ua nkauj ua nraug ntuj tag hmo teb tag HNUB es leej tub li koj nim hais seev yees tias seb niam ntxhais puas nco thiab puas HLUB los kuv niam ntxhais tseem yog leej niam leej txiv ib tug ntxhais tseem yau es tswv yim tsis tau loj, peev xwm los muaj tsis tau PUV, kuv thiaj dag kuv xab yeeb swm phooj ywg li koj hmo dhau hmo hnub dhau HNUB, nim no thiaj li tsis tau koj ces thiaj li plam tag kuv xab yeeb swm phooj ywg kuv me hmoob swm nraug li ntawm koj mus rau lawv ua tus HLUB…..

Nib ye………. Ntuj nas hmoob, cas wb ua nkauj ua nraug hnub txooj nte tuaj thaum ub es wb nim ua ke nruj nraim tuav tes tej sib rawv es txiv tub li koj nim tsa ncauj saub seev yuj yees tias keev lam muaj txoj hmoo kuv tau koj, koj tau kuv es kuv tau los nrog koj koom ib tug pog hu ib tus YAWG los vim yog kuv niam ntxhais no lub cev nkauj xwb loj tsis tau tiav txuj es peev xwm los tsis tau muaj, tswv yim los tsis tau TAWG es tseem ntshaw txoj kev kawm txuj thiab kawm NTAWV, kuv tsis nrog koj mus kuv thiaj li tsis tau koj ces nim no thiaj li plam plhuav kuv tus me hmoob swm nraug li koj lub cev nraug xwb mus rau LAWV.

Nib ye…….. Tiam me neej no tsis sib tau es txij li hnub txiv tub li koj muaj tab muaj zag tag es koj yuav mus ua hmoob zeeg nraj lum vauv sua lis yeev rau lub rooj KOS, niam ntxhais tsis quaj los txiaj ntsim kua muag sib tw LOS, koj mus muaj tab muaj zag tag ces kho koj siab los koj nim zoo mus nrog koj leej tab leej zag hais lus sib thab coj sib puag NPO, kuv nyob kuv nco nco koj ces yuav zoo tam ntua li lub 7 hli ntuj qhuav es ntuj qhuav teb nkig nkuav nqhis nqhis dej qhuav siab QHO, niam ntxhais ncauj hais tsis tau ib los qhia leej twg los nplooj siab ntaus ntiag nplooj ntsws tias kheev lam lub ntuj nim txawj txeeg lub teb nim txawj tig muab koj lub cev nraug xwb tig zoj rov qab los ua leej niam leej txiv ib leeg tub luag ntxuaj tes kha rau kuv ib leeg NCO.

Nib ye………… Sim neej no tsis sib tau es txij li hnub txiv tub li koj muaj tab muaj zag tag es koj yuav mus ua hmoob zeeg nraj lum vauv sua lis yeev rau lub rooj CAWV es niam ntxhais tsis quaj los yeej tusiab tej sib NRHAWV, koj mus muaj tab muaj zag ces kho koj siab los koj nim zoo mus tham tuj taws nyob tuav tes RAWV. Kuv nyob kuv nco nco koj ces zoo tam ntua li lub 7 hli ntuj qhuav es ntuj qhuav teb nkig nkuav nqhis nqhis dev qhuav siab QHAWV. Sim neej no ncauj hais tsis tau ib los qhia leej twg los saib xav yuj ywm tias kheev lam lub ntuj lam txawj txeeg teb txawj tig ces muab koj lub cev nraug xwb tij zoj rov los ua leej niam leej txiv ib leeg tub luag ntxuaj tes kha rau kuv ib leeg TAWB.

Nib ye……… Ntuj nas hmoob, cas luag nim tsuas cav tau rev paj ntshua nplaim nyob qaum ntuj thiaj li tawg zoo es ntiaj teb no ces yog rev paj huab poob thiaj li tawg TSHIAB. Cas nyob ntiaj teb ces kev nkauj nraug tsis sib tau thiaj li quaj puag niaj seev puag XYOO es xab yeeb plees nkauj nraug daj tsis tau tham tsis yuav thiaj li lwj SIAB.

Nib ye……… Ntuj nas hmoob, cas luag nim tsuas cav tau rev paj ntshua nplaim nyob qaum ntuj thiaj li tawg NRA es ntiaj teb no ces yog rev paj huab poob thiaj li tawg NTSAWV. Cas nyob ntiaj teb ces kev nkauj nraug tsis sib tau thiaj xav npo PA es xab yeeb plees nkauj nraug daj tsis tau tham tsis yuav thiaj limob PLAWV, ces chim siab luaj no tsis xav tuag es sim nkauj sim nraug daj tsis tau tham tsis yuav los mam li muab khaws cia ua nkauj nraug lub chaw nco coj chaw TSHUA.

Ntuj tsiag liag teb tsiag liag sa yuam lawv tej me tub hluas hmoob, cas kuv muam nkauj lig pw teb TIG ces yuav tshav tag tub nraug num tab li koj ntuj lawm tej niag sib NRIG nas yuam lawv tej tub hluas hmoob.

Ntuj tsiag liag teb tsiag liag sas yuam lawv tej me tub hluas hmoob, cas kuv muam nkauj lig pw teb TIAG ces yuav tshav tag tub nraug num tab li koj ntuj lawm tej niag sib LIAG sas yuam lawv tej tub hluas hmoob.

Ntuj tsiag liag teb tsiag liag sas yuam lawv tej me tub hluas hmoob, cas niag ntses nuj ntaus ntses niag ces yuav liam txuj txias lawm tej niag qab PAS, sas yuam tus hmoob. Cas wb nim daj dee hais zoo luaj no es nyob li koj ces tsis phim ua lub dej puas lub lwg NRA sas yuam lawv tej tub.

Ntuj tsiag liag teb tsiag liag sas yuam lawv tej me tub hluas hmoob, cas niag ntses nuj ntaus ntses niag ces yuav liam txuj txias lawm tej niag qab THU, sas yuam tus hmoob. Cas wb nim daj dee hais zoo luaj no es nyob li koj ces tsis phim ua lub dej puas lub lwg NTSU sas yuam lawv tej tub.

Ntuj tsiag liag teb tsiag liag sas yuam lawv tej me tub hluas hmoob, cas niag yaj tsi ntsi li yeev poob nthav tuaj rau nram i, cas wb nim daj dee hais zoo luaj no ces cia muaj ib hnub twg muam nkauj lig ntsib dheev txiv nraug nuj tab ntawm tej niag yas kab, ntshe ncauj tsis khuv hais los cim nplooj siab nthuav ntsws twb nyiag hu tub nraug nuj tab luag lawm tej niag sib NTXHI sas yuam lawv tej tub hluas hmoob.

Ntuj tsiag liag teb tsiag liag sas yuam lawv tej me tub hluas hmoob, cas niag yaj tsi ntsi li yeev poob nthav tuaj rau nram HAV, cas wb nim daj dee hais zoo luaj no ces cia muaj ib hnub twg muam nkauj lig ntsib dheev txiv nraug nuj tab ntawm tej niag yas kab, ntshe ncauj tsis khuv hais los cim nplooj siab nthuav ntsws twb nyiag hu tub nraug nuj tab luag lawm tej niag sib NYAV, ces cia ntuj ntxhoo rov li loo, ntshe yuav rov hlo niam peb hlis NCUA, es ntuj ntsim sas yuam lawv tej tub hluas hmoob tus suab QHUA!

Me hmoob e.. cas nim daj los sib tau es ua lub neej txog txij no xav tias tsis muab lub neej tso puas tsuaj rhuav puas ntsoog los vim yog ua ib sim neej nyob ces kuv niam ntxhais nim tsis tau koj ib lo lus zoo coj nrog lus sib.. nim tsis tau koj lo lus mos nrog lus qab zib. Es nim ua neej nrog koj lo lus phem tuaj nrog lus khib. Thiaj li ua zoj ib siab muab koj nrauj ncua mus ua ib sim nkauj tawm rooj plaws pos kaum ncauj luag hawv hiv. Mam li mus sia dua hlab mus hloov dua siv. Cia ua neej txog txij no lawm tsis zoo ces cia koj mus yuav dua nyab kuv mus nrhiav dua txiv… hahhhahahaha

Me hmoob e… cas nim daj los sib tau es ua lub neej txog txij no xav tias cia ua ib siab hlub wb tub coj wb ntxhais. Los kuv niam ntxhais twb tsis tau koj ib lo lus zoo tuaj ua tib zoo hais. Nim los ua lub neej nrog lo lus iab siab niaj hnub sib cais. Thiaj li ua zoj ib siab muab nrauj ncua tuaj tsis xav hais. Cia li mus ntim ntua lub cev txiaj zam mus tawm rooj plaws pos kaum ncab luag li nyav. Mam li mus hloov dua siv sia dua hlab. Mam li mus yuav dua txiv ua dua nyab…hehhehhe..

Ua lub neej txog txij no tsis zoo lawm tiag ces wb muab lub neej nrauj ncua koj tsis txhob nco. Zoo thiab tsis zoo los koj li mus yuav ib tug los hlub koj rau koj nco. Kuv txawm nco koj npaum twg los cia mam li quaj twj ywm ua tus txiaj oob kuamuag tuaj ntws tawv to. Mam ua ib siab mus pib lub neej tshiab kom tag ib sim neej rau tiam no.

Ua lub neej txog txij no tsis zoo lawm tiag ces cia wb muab lub neej nrauj ncua koj tsis txhob tshua. Zoo thiab tsis zoo los koj li mus yuav ib tug los rau koj hlub thiab koj puag. Kuv nco koj npaum twg los mam li mus quaj twj ywm nrog lub kuamuag. Mam li ua zoj ib siab mus pib lub neej tshiab kom txog hnub kuv laus ploj es koj laus tuag..

Ua neej txog txij no kuv nyob los twb tsis zoo. koj twb tsis hlub kuv lawm tiag ces cia koj mus yuav dua koj sev niam nkauj zag. Los nrog koj koom siab nyob koom pa. seb koj lub meej puas yuav nrov zoo.. koj lub moo puas yuav nrov ncha.

Ua lub neej txog txij no lawm tsis zoo ces cia koj mus ua dua vauv xaus dua tshoob. Koj li mus yuav dua qhua tauj ob cag hmoob. Seb koj puas yuav muaj meej nyob nto koob.

Ua lub neej txog txij no tsis zoo lawm ces koj mus koj kuv mus kuv. Kuv niam ntxhais yuav mus ua lub neej nyob qab zeb coj qab ca. Yuav mus ua lub neej nyob tsis muaj tsev nrog muaj vaj. Los tsuav koj nyob koj lub siab kaj.

Ua neej txog txij no tsis zoo ces cia koj taug koj kev dav kuv taug kuv kev deb. Kuv yuav mus ua neej nyob qab ca coj qab zeb. Los tsuav koj ua neej nyob luag ntxhia li neeg ntiaj teb ces yuav zoosiab xaus xi daim dua tau. Muab koj nrauj ncua tseg ces mam li mus ua lub neej nco koj txog hnub laus..

Hmoob txiv leej tub cas ua nkauj ua nraug nyob ces nim ntshai ruj rwg tias tsam daj dee tsis sib tau es thiaj li muab wb daim ntawv nkauj ntawv nraug rau ob leeg nqa es muab daim ntawv txij ntawv nkawm rau ob leeg pus es yog daj dee los sib tau los cia ob leeg mam mus ua sim neej los sib hlub los vim yog lub teb lub chaw nyob ywj pheej es tej tub tej roog tawm rooj plaws los mus deev tau pej kum lwj haiv neeg tej me ntxhais ncauj pheeb khab xws ncauj npliag, yuav luag 3 suab npuaj teg mus tuaj ntaug taw NTUAV ces ces ntshe leej tub li koj ib los txooj nyob tsis hais, muaj tub muaj ki los yuav tso tej tub tej ki tej sib PLHUAV es yuav tso tub ki quaj ntsuag rau khab theeb tim puam quaj lwj siab lawm tej sib NTSUAV ntsia ntsoov lub mus ntuj huv ces hnub txooj nreg yav ntuj thaum ub tsuj tseeb los hais tsis tseeb, ces cia dab sij XEEB sawv sam luj TEEB tus me kuj txws phim kuj TEEB es kuj hom li pes cab XEEB, ceeb xeeb lauv yim cab txeeg khuam tag tej sib NIAB ces cia tub ki quaj ntsuag qees rau tom qab es ua ib siab tso leej tub leej roog mus ua 33 zag neej rau tom ntej ywj lub SIAB os mog..

Hnub txooj nres thaum ub ntshai ruj rwg tsam daj tsis tau lub ncauj tsis hais thiaj li swb ncauj yeem lus tias cia muab daim ntawv nkauj ntawv nraug rau ob leeg pus es muab ntawv txij ntawv nkawm rau ob leeg nqa los vim yog rooj teb no lub teb lub chaw nyob ywj pheej ces muaj zoo tub coj zoo roog los tawm rooj plaws yuav mus deev tau pej kum lwj haiv neeg tej me ntxhais ncauj pheeb khab xws ncauj npliag, yuav luag 3 suab npuaj teg mus tuaj ntaug taw NTAWS ces ib los leej tub leej roog txhooj tsis hais es tso tub kis quaj zig qees rau tom qab tso leej tab leej zag quaj ntsuag rau kab theeb tim puam lwj siab tej sib NTXAWS ces mam li xav zoj txog yav neej thaum ub, cia tsuj tseeb hais tsis tseeb ces cia dab sij XEEB sawv los sam luj TEEB tus me kuj teeb phim kuj TXWS kuj hom li xab xyuam phooj YWG, ces ceeb xeeb lauv yij cab txeeg khuam tej lis RAWV es ntshe yuav quaj seev yuj yees tias rab teb rooj ntug no ces noj taus tuaj hais tsis taus ces cia ua ib siab tso leej tub leej roog mus ua 33 zag neej tom ntej ywj lub PLAWV ….

Cas ua ib sim neej nyob koj tsis hlub kuv uas koj mus deev tau pej kum lwj haiv neeg es yuav mus nrog luag sib daj tuaj sib DOOG uas ntshai ruj rwg tsam luag qhua tauj lwm haiv neeg ntxhais muab koj xauv li zias rau lub nruas PHOO es tsam luag qhua tauj lwm haiv neeg ntxhais hu zoj rau tub coj xwm tuaj coj koj mus kaw nkaus rau tus ko NTOO ces ntshe yuav khib khib koj nplooj siab tsis kaj es mob mob koj nplooj ntsws tsis ZOO os leej tub leej roog..

Cas ua ib sim neej nyob koj tsis hlub kuv uas koj mus deev tau pej kum lwj haiv neeg es yuav mus nrog luag sib daj tuaj sib DIAJ uas ntshai ruj rwg tsam luag qhua tauj lwm haiv neeg ntxhais muab koj xauv li zias rau lub nruas PHIAJ es tsam luag qhua tauj lwm haiv neeg ntxhais hu zoj rau tub coj xwm tuaj coj koj mus kaw nkaus rau lub nruas NYIAJ ces ntshe yuav khib khib koj nplooj siab tsis kaj es mob mob koj nplooj ntsws tsis zoo ces koj yuav poob koj lub koob tsim nqi es koj yuav tseg koj lub npe txim TXIAJ ces chim siab luaj no xaus li xi lub ntsis NROJ. Paub tias lub neej tsis zoo cia hnub txooj nreg nram ntxov kuv mus yuav qhua tauj yas ob cag tseg ncuas tsis txhob yuav KOJ..

Cas tiam neej no tsis tau yus tus nraug ib txwm THAB nas tub nraug hmoob tus kuv nco, cas kom nim mus ua lub niag neej zoo zoo es koj tsis nco kuv uas kuv mus tau leej tub leej roog ces twb tsis txawm los nrog kuv ua lub neej nyob sib PAB, cas nim zoo li lub tsheb tooj nrog tsheb hlau es ntswj kauj puas tsawg los yeej mus tsis ncaj KAB. Cas yuav neej yuav zoo npaum twg los leej tub leej roog ces twb tsis xav nrog kuv niam ntxhias no mus ua noj nqis ua HNAV. Ces ntshe yuav nco nco kuv me hmoob swm nraug tus me neeg hais lus zoo hnub txooj nteg thaum ntxov nws nyob ntawm kuv ib SAB, ces ntshe yuav muab kuv me swm nraug li koj nco nco mus txog hnub kuv lub cev zeej neeg no tuag nthi lwj tsus nyob mus xyaw AV.

Sim neej no cas daj tsis tau yus tus nraug ib txwm thab es niaj hnub nyob sib ZE. Cas koj nim tsis paub uas koj mus tau lub neej zoo ces koj tsis nco kuv es kuv mus tau leej tub leej roog ces nim tsis xav los nrog kuv tab lub cuab khwv rau lub TSEV, cas nim zoo tam li lub niag tsheb tooj tsheb hlaus es yuav ntswj kauj npaum twg los mus tsis ncaj KEV. Cas lub neej yuav zoo thiab tsis zoo los leej tub leej roog yeej tsis xav pab raus TES es ntshe yuav nco nco kuv me hmoob swm nraug li ntawm koj mus txog hnub kuv lub cev ntag ntsug no tuag nthi tso plhuav lub ntiaj teb no TSEG.

Ntuj nas kuv me hmoob swm nraug tus kuv nco, cas tav ntuj los tsam no ces koj thiab kuv wb nim nyob mus laus tag es kuv lam mus ua lub neej saub seeb yuj yees rau tej niag qab ROOB los nim nco nco kuv xav yeeb swm phooj ywg tus me zoo HMOOB. Ces lub ncauj tsis khuv hais los kuv kuamuag yeej nrog to tuaj sib tw POOB los twb vim yog nco nco kuv tus swm nraug lo lus mos tuaj nrog lo me lus SOOB. Ntshe tiam neej no ces yuav nco nco cim ntsuj ntsoov koj tus ntsuj plhu cia tag nrho kuv ib sim neej es koj lub npe nraug xwb kuv yuav cim ntsoov tuaj nruab siab tsis pub kom POOB.

Ntuj nas kuv me hmoob swm nraug tus kuv nco, cas tav ntuj los tsam no ces koj thiab kuv wb nim nyob mus laus tag es kuv lam mus ua lub neej saub seeb yuj yees tuaj daim teb DO los nim tshua tshua kuv xav yeeb swm phooj ywg tuaj tus kuv NCO. Ces lub ncauj tsis khuv hais los kuv kuamuag yeej sib tw NROG los twb vim yog nco nco kuv tus swm nraug lo lus zoo tuaj nrog lo me lus MOS. Ntshe tiam neej no ces yuav nco nco cim ntsuj ntsoov koj tus ntsuj plhu cia tag nrho kuv ib sim neej es koj lub npe nraug xwb kuv yuav cim ntsoov tuaj nruab siab tuaj tsis muab TSO.

Tiam neej no daj dee zoo luaj no tsis tau lawm los cia tseg es ntshe yuav tas nrho ib sim neej no kuv tsis tau koj mus nrog kuv nyob ua ib ke koom pw ua ib LAV. Mam li nco cim ntsuj ntsoov kom txog hnub kuv cev ntaj tuag tas lwj li dhi rau nruab AV. Mam nco li ntsoov kuv tus swm nraug uas ib txwm THAB, fab lwm tiam mam li mus thov ntawv pem ntuj seb puas tau los ciaj koj ib zaug NYAB.


Tiam neej no daj dee zoo luaj no tsis tau lawm los cia tseg es ntshe yuav tas nrho ib sim neej no kuv tsis tau koj mus nrog kuv nyob ua TSE koom pw ua ib KE. Mam li nco cim ntsuj ntsoov kom txog hnub kuv cev ntaj tuag tas lwj li dhi rau nruab HLEB. Mam nco li ntsoov kuv tus swm nraug uas ib txwm thab nrog ib txwm DE, fab lwm tiam mam li mus thov ntawv pem ntuj seb puas tau los ciaj koj ib zaug SEV ces chim siab luaj no…